ថ្លែងក្នុងឱកាសនៃសិក្ខាសាលានេះ ឯកឧត្តម ឆឹម សំអ៊ែល បានសម្ដែងនូវការកោតសរសើរ និងវាយតម្លៃខ្ពស់ចំពោះការខិតខំរបស់ឯកឧត្ដម លោកជំទាវ លោក លោកស្រីទាំងអស់ដែលបានចូលរួមគាំទ្រ អនុវត្ត និងផ្សព្វផ្សាយអំពីកម្មវិធីកំណែទម្រង់វិមជ្ឈការ និងវិសហមជ្ឈការ ដើម្បីធានាក្នុងការលើកកម្ពស់អភិបាលកិច្ចនៅមូលដ្ឋាន ស្របទៅតាមចក្ខុវិស័យកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២។ ជាមួយគ្នានេះផងដែរ ឯកឧត្តមក៏បានថ្លែងអំណរគុណដល់កិច្ចសហប្រតិបត្តិការអន្តរជាតិអាល្លឺម៉ង់ (GIZ) ដែលបានដឹកនាំ និងសម្របសម្រួលការពិនិត្យឡើងវិញ និងកែសម្រួលយុទ្ធសាស្រ្តប្រាស្រ័យទាក់ទងសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដើម្បីឆ្លើយតបទៅនឹងតម្រូវការជាក់ស្តែង បញ្ហាប្រឈម និងស្របទៅតាមការវិវឌ្ឍនៃប្រព័ន្ធបច្ចេកវិទ្យាឌីជីថល ដែលធានាឱ្យការពង្រឹង និងកែលម្អវិធីសាស្រ្តនានានៃការប្រាស្រ័យទាក់ទងឱ្យកាន់តែមានប្រសិទ្ធភាព និងប្រសិទ្ធផល។

នាឱកាសនៃសិក្ខាសាលានេះផងដែរ ក៏មានមតិចំណាប់អារម្មណ៍ពីដៃគូអភិវឌ្ឍ តំណាងដោយលោក ម៉ែន គុណរ័ត្ន ប្រធានក្រុមការងារវិមជ្ឈការនៃកម្មវិធីធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋនៅប្រទេសកម្ពុជាដំណាក់កាលទី២ (GIZ-ISDII) ដោយលោកបានធ្វើការគូសបញ្ជាក់ពីសារៈសំខាន់នៃការប្រាស្រ័យទាក់ទងគ្នាជាប្រចាំ នឹងនាំឱ្យភាគីពាក់ព័ន្ធនីមួយៗអាចទទួលបានព័ត៌មានច្បាស់លាស់ និងទាន់ពេលវេលាអំពីដំណើរការ ឫជំហាននានាដែលខ្លួនត្រូវអនុវត្ត ឬត្រូវចូលរួម។ ជាការពិតណាស់ ការប្រាស្រ័យទាក់ទងគ្នាជាប្រចាំប្រកបដោយប្រសិទ្ធភាពជាការលើកកម្ពស់ដល់ការចូលរួម ហើយការចូលរួមលើកកម្ពស់ដល់ការងារអភិបាលកិច្ច ពិសេសលើជ្រុងនៃតម្លាភាព និងគណនេយ្យភាព ព្រមទាំងអាចជំរុញដល់កិច្ចសហការរវាងក្រសួងស្ថាប័ន រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល វិស័យឯកជន និងប្រជាពលរដ្ឋ នៅក្នុងការអភិវឌ្ឍមូលដ្ឋានប្រកបដោយនិរន្តភាពផងដែរ។

សិក្ខាសាលានេះរៀបចំឡើង ចំនួន ០២ថ្ងៃ គឺនៅថ្ងៃទី៣០-៣១ ខែកក្កដា ឆ្នាំ២០២៧ ដោយនៅថ្ងៃទី១ នៃសិក្ខាសាលាគឺមានការអញ្ជើញចូលរួមពីតំណាងក្រសួង ស្ថាប័ន និងដៃគូអភិវឌ្ឍ រីឯនៅថ្ងៃទី២ នឹងមានការអញ្ជើញចូលរួមពីតំណាងរដ្ឋបាលថ្នាក់ក្រោមជាតិ ដែលការរៀបចំឡើងចំនួន២ថ្ងៃនេះក្នុងគោលបំណង ដើម្បីពិនិត្យ និងពិគ្រោះទៅលើសេចក្ដីព្រាងយុទ្ធសាស្ត្រប្រាស្រ័យទាក់ទង ក៏ដូចជាប្រមូលធាតុចូលបន្ថែមទៀតដើម្បីធ្វើយ៉ាងណាឱ្យការរៀបចំសេចក្ដីព្រាងនេះដែលរៀបចំដោយក្រុមការងារបច្ចេកទេសនៃលេខាធិការដ្ឋានគ.ជ.អ.ប. មានលក្ខណៈល្អប្រសើរ និងមានការចូលរួមពីគ្រប់ភាគីពាក់ព័ន្ធ ដែលនឹងធ្វើឱ្យយុទ្ធសាស្ត្រប្រាស្រ័យទាក់ទងដែលរៀបចំឡើងនេះ ក្លាយជាឯកសារគោលបម្រើដល់ការផ្សព្វផ្សាយលើការងារកំណែទម្រង់វិមជ្ឈការ និងវិសហមជ្ឈការ បានលឿនរហ័ស ប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម។

គួរជម្រាបជូនផងដែរថា គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ធ្លាប់បានរៀបចំយុទ្ធសាស្ត្រប្រាស្រ័យទាក់ទងរួចមកហើយនៅឆ្នាំ២០១៧ ដោយមានការគាំទ្របច្ចេកទេសពីដៃគូអភិវឌ្ឍនាពេលកន្លងមក។ ការកែសម្រួលយុទ្ធសាស្ត្រប្រាស្រ័យទាក់ទងថ្មីនាពេលនេះគឺជាការធ្វើទំនើបកម្មទៅលើយុទ្ធសាស្ត្រសំខាន់ៗមួយចំនួនដើម្បីឆ្លើយតបទៅនឹងការវិវឌ្ឍយ៉ាងឆាប់រហ័សនៃបច្ចេកវិទ្យានាពេលបច្ចុប្បន្ន។

សិក្ខាសាលាពិគ្រោះយោបល់នេះក៏មានកាអញ្ជើញចូលរួមពីឯកឧត្តម លោក លោកស្រី តំណាងក្រសួងស្ថាប័ន ដៃគូអភិវឌ្ឍ និងអ្នកពាក់ព័ន្ធសរុបចំនួន ៣២រូប ស្ត្រី ៣រូប។