កិច្ចប្រជុំត្រៀមការពិនិត្យ និងពិភាក្សាលើការរៀបចំសិក្ខាសាលាចែករំលែកបទពិសោធន៍ស្តីពីការចូលរួមរបស់អាជ្ញាធរមូលដ្ឋានក្នុងការកសាងអង្គភាពផ្តល់សេវាសាធារណៈគំរូក្នុងវិស័យសុខាភិបាល និងវិស័យអប់រំ ដែលគ្រោងប្រព្រឹត្តទៅក្រោមសហអធិបតីភាពដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគ.ជ.អ.ប.។

អង្គប្រជុំបានពិនិត្យ និងពិភាក្សាលើខ្លឹមសារ កម្មវិធី និងការរៀបចំសិក្ខាសាលា ដោយផ្តោតលើការផ្សព្វផ្សាយ និងចែករំលែកឧត្តមានុវត្តន៍ល្អៗរបស់រដ្ឋបាលថ្នាក់ក្រោមជាតិ និងផ្តល់ការណែនាំតម្រង់ទិសអំពីការអនុវត្តតួនាទី ភារកិច្ចរបស់របស់អាជ្ញាធរមូលដ្ឋានក្នុងការផ្តល់សេវាសាធារណៈពាក់ព័ន្ធវិស័យអប់រំ និងសុខាភិបាល។ ក្នុងន័យនេះ អង្គប្រជុំបានឯកភាពលើការអញ្ជើញតំណាងរដ្ឋបាលថ្នាក់ក្រោមជាតិ និងអង្គភាពផ្តល់សេវាសាធារណៈគំរូដែលទទួលបានជ័យលាភី ឱ្យធ្វើបទបង្ហាញ និងចែករំលែកបទពិសោធន៍ពាក់ព័ន្ធនឹងការដឹកនាំ ការគាំទ្រធនធាន ការសម្របសម្រួលជាមួយមន្ទីរជំនាញ ការចូលរួមរបស់សហគមន៍ និងការបង្កើតបរិយាកាសអំណោយផលសម្រាប់ការលើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ។

បន្ថែមពីនេះ អង្គប្រជុំបានពិភាក្សាលើការរៀបចំកិច្ចការគាំទ្រផ្សេងៗ រួមមានការរៀបចំទីតាំង និងការតុបតែងសាលប្រជុំ ការរៀបចំប្រព័ន្ធសំឡេង និងបច្ចេកទេស ការផ្សព្វផ្សាយព័ត៌មាន ការសម្របសម្រួលជាមួយអ្នកសារព័ត៌មាន ការរៀបចំអាហារសម្រន់ និងអាហារថ្ងៃត្រង់ ព្រមទាំងការរៀបចំប្រព័ន្ធចូលរួមតាមប្រព័ន្ធអនឡាញសម្រាប់អ្នកចូលរួមនៅតាមមូលដ្ឋាន។

ជាលទ្ធផល អង្គប្រជុំបានឯកភាពឱ្យក្រុមការងារបច្ចេកទេសនៃក្រសួងមុខងារសាធារណៈ ក្រសួងមហាផ្ទៃ និងលេខាធិការដ្ឋាន គ.ជ.អ.ប. បន្តសម្របសម្រួល និងរៀបចំកិច្ចការបច្ចេកទេស ខ្លឹមសារ ឡូជីស្ទិក និងកិច្ចការពាក់ព័ន្ធទាំងអស់ សម្រាប់ដាក់ជូនថ្នាក់ដឹកនាំពិនិត្យ និងសម្រេចជាបន្តទៀត ដើម្បីធានាឱ្យសិក្ខាសាលាខាងលើប្រព្រឹត្តទៅដោយជោគជ័យ និងសម្រេចបាននូវគោលបំណងដែលបានគ្រោងទុក៕