ទីស្តីការក្រសួងមហាផ្ទៃ៖ នៅថ្ងៃព្រហស្បតិ៍ ទី៤ ខែមិថុនា ឆ្នាំ២០២៦ នេះ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. បានអញ្ជើញអមឯកឧត្តម អ៊ុំ ម៉ារ៉ា រដ្ឋលេខាធិការក្រសួងមហាផ្ទៃទទួលជួបពិភាក្សាការងារ ជាមួយលោកស្រី Natalie Andre តំណាងវិទ្យាស្ថានអភិវឌ្ឍន៍បៃតងសកលប្រចាំនៅកម្ពុជា ដើម្បីពិភាក្សាទៅលើសេចក្ដីព្រាងក្របខណ្ឌផែនការប្រចាំប្រទេសកម្ពុជា ក្នុងការធានាបាននូវសង្គតិភាពទៅនឹងផែនការអាទិភាពជាតិ និងផែនការយុទ្ធសាស្ត្ររបស់ក្រសួងមហាផ្ទៃ និងលេខាធិការដ្ឋាន គ.ជ.អ.ប.។

ក្នុងដំណើរទស្សនកិច្ចនេះ គណៈប្រតិភូបានអញ្ជើញទៅពិនិត្យការអនុវត្តការងារនៅ សាលាបឋមសិក្សាឧត្តរ ដែលបានចាប់ផ្តើមអនុវត្តការងារគណនេយ្យភាពសង្គមតាំងពីឆ្នាំ២០២៤។ ក្រោយអនុវត្តការងារនេះ សាលាមានការផ្លាស់ប្រែយ៉ាងច្រើនលើផ្នែកបរិស្ថាន សន្តិសុខ អនាម័យ និងសណ្តាប់ធ្នាប់។ ហេដ្ឋារចនាសម្ព័ន្ធរូបវ័ន្តត្រូវបានកែលម្អ រួមមានការជួសជុលទីចាត់ការ ក្រាលការ៉ូឡាក្នុងបរិវេណសាលា និងច្រកចូលសាលា។ ក្នុងបន្ទប់ថ្នាក់ក៏មានការបំពាក់ទូរទស្សន៍ឆ្លាតវៃ និងម៉ាស៊ីនព្រីន ដើម្បីគាំទ្រដល់ការបង្រៀន និងការរៀន។ ទន្ទឹមនឹងនេះ សាលាបានពង្រឹងការគ្រប់គ្រងរដ្ឋបាល ថ្នាក់រៀន និងគុណភាពនៃការបង្រៀន ដែលធ្វើឱ្យចំនួនសិស្សឡើងថ្នាក់មានការកើនឡើងជាបន្តបន្ទាប់។ អាណាព្យាបាលសិស្សក៏មានការយល់ដឹង និងចូលរួមគាំទ្រសកម្មភាពសាលាកាន់តែសកម្ម ជាពិសេសតាមរយៈការបង្កើតគណកម្មការថ្នាក់រៀនដើម្បីអភិវឌ្ឍថ្នាក់រៀន។

នៅសាលាបឋមសិក្សាភូមិគរ គណៈប្រតិភូ បានសង្កេតឃើញកិច្ចខិតខំប្រឹងប្រែងក្នុងការកែលម្អបរិយាកាសសិក្សា និងពង្រឹងការចូលរួមរបស់សហគមន៍ក្នុងវិស័យអប់រំ។ តំណាងសាលាបានបញ្ជាក់ថា អាណាព្យាបាល និងសហគមន៍កាន់តែចូលរួមគាំទ្រការសិក្សារបស់កុមារ និងសកម្មភាពអភិវឌ្ឍន៍សាលា។ ការកែលម្អហេដ្ឋារចនាសម្ព័ន្ធ រួមមាន ការចាក់បេតុងទីធ្លាសាលា ការជួសជុលរបង និងការរៀបចំកន្លែងលាងដៃ បានជួយបង្កើតបរិយាកាសសិក្សាដែលមានសុវត្ថិភាព និងគាំទ្រដល់សិស្សានុសិស្សកាន់តែប្រសើរ។