កម្មវិធី “ធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋក្នុងនៅប្រទេសកម្ពុជា ដំណាក់កាលទី២” (ISD II) គឺជាគំនិតផ្តួចផ្តើមមួយរបស់រាជរដ្ឋាភិបាលកម្ពុជា​​ក្នុងការចូលរួម​គាំទ្រដល់ការអនុវត្តការងារកំណែទម្រង់វិមជ្ឈការ និងវិសហមជ្ឈការនៅកម្ពុជា ដោយកម្មវិធីនេះ​ទទួលបានហិរញ្ញប្បទានពីក្រសួងសហប្រតិបត្តិការសេដ្ឋកិច្ច និងអភិវឌ្ឍន៍ (BMZ) នៃសាធារណរដ្ឋ​សហព័ន្ធអាល្លឺម៉ង់ រួមជាមួយការចូលរួមបដិភាគពីទីភ្នាក់ងារស្វីសសម្រាប់កិច្ចអភិវឌ្ឍន៍ និងសហប្រតិបត្តិការ (SDC) និងជំនួយអភិវឌ្ឍន៍លុចសំបួរ(LuxAid)។

ក្នុងឱកាសសិក្ខាសាលានេះ ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. បានមានប្រសាសន៍ឱ្យដឹងថា កម្មវិធី ISD II គឺជាកម្មវិធីនៃកិច្ចសហការរវាងលេខាធិការដ្ឋាន គ.ជ.អ.ប. និងកិច្ចសហប្រតិបត្តិការអន្តរជាតិអាល្លឺម៉ង់ ហៅថា GIZ ដើម្បីគាំទ្រដល់ការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ តាមរយៈការចូលរួមចំណែកដល់ការកែលម្អការផ្តល់សេវាសាធារណៈ និងការអភិវឌ្ឍមូលដ្ឋាន ការពង្រឹងសមត្ថភាពស្ថាប័ន និងដំណើរការនានានៅរដ្ឋបាលក្រុងស្រុក ការពង្រឹងគណនេយ្យភាព និងការចូលរួមរបស់ប្រជាពលរដ្ឋ ការបណ្តុះបណ្តាល និងការពង្រឹងសមត្ថភាពមន្ត្រី ព្រមទាំងការរៀបចំគោលនយោបាយនានាគាំទ្រដល់ដំណើរការកែទម្រង់។ ទន្ទឹមនឹងនេះ ឯកឧត្តមបានអបអរសាទរចំពោះខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តស្ទឹងត្រែង ព្រមទាំងរដ្ឋបាលក្រុង រដ្ឋបាលស្រុកទាំង១៨នៃខេត្តទាំង០៤ ដែលត្រូវបានជ្រើសរើសជារដ្ឋបាលក្រុងស្រុកដៃគូសម្រាប់អនុវត្តកម្មវិធីនេះរយៈពេល០៤ឆ្នាំ គឺចាប់ពីខែមករា ឆ្នាំ២០២៦ រហូតដល់ខែធ្នូ ឆ្នាំ២០២៩ ខាងមុខ។

សិក្ខាសាលានេះ មានសមាសភាពអញ្ជើញចូលរួមពីឯកឧត្តម លោកជំទាវ​រដ្ឋលេខាធិការ អនុរដ្ឋលេខាធិការ អគ្គនាយក ប្រធានអង្គភាព ប្រធានក្រុមប្រឹក្សាខេត្ត សមាជិកក្រុមប្រឹក្សាខេត្ត អភិបាលនៃគណៈអភិបាលខេត្ត អស់លោក លោកស្រីតំណាងលេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងមុខងារសាធារណៈ ក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន ក្រសួងផែនការ ក្រសួងធនធានទឹក និងឧតុនិយម ក្រសួងកិច្ចការនារី រដ្ឋបាលខេត្តសៀមរាប ខេត្តស្ទឹងត្រែង ខេត្តបន្ទាយមានជ័យ ខេត្តបាត់ដំបង មន្ទីរជំនាញជុំវិញខេត្តសៀមរាប តំណាងទី​ភ្នាក់ងារស្វីស​សម្រាប់ការ​អភិវឌ្ឍ​និង​កិច្ចសហប្រតិបត្តិការ​ប្រចាំនៅកម្ពុជា​(SDC) តំណាងស្ថានទូត​អាល្លឺម៉ង់​ប្រចាំ​​កម្ពុជា តំណាងទីភ្នាក់ងារសហប្រតិបត្តិការអភិវឌ្ឍន៍លុចសំបួ ទីភ្នាក់ងារសហប្រតិបត្តិការអន្តរជាតិជប៉ុន (JICA) កម្មវិធីអភិវឌ្ឍន៍អង្គការសហប្រជាជាតិ (UNDP) កម្មវិធីតាំងទីលំនៅរបស់អង្គការសហប្រជាជាតិ (UNHABITAT) មូលនិធិអភិវឌ្ឍន៍មូលធនរបស់អង្គការសហប្រជាជាតិ ការិយាល័យប្រចាំកម្ពុជា (UNCDF) ធនាគាអភិវឌ្ឍអាស៊ី​(ADB) អង្គការសង្គមស៊ីវិល វិស័យឯកជន​ និង​​អ្នកពាក់ព័ន្ធសរុបប្រមាណ ១៥០រូប។

គួរបញ្ជាក់ថា កម្មវិធី ISD II ផ្តោតលើលទ្ធផលការងារសំខាន់ៗចំនួន៥ រួមមាន លទ្ធផលទី១. ការពង្រឹងសមត្ថភាពប្រតិបត្តិការ ២. ការពង្រឹងសមត្ថភាពស្ថាប័នរបស់រដ្ឋបាលស្រុក និងក្រុង ដើម្បីឱ្យអាចរៀបចំផែនការសកម្មភាព និងថវិកាអនុវត្តសេវារដ្ឋបាល ព្រមទាំងជ្រើសរើសសេវាតាមវិស័យ បានកាន់តែប្រសើរ ៣. សេវាទាំងនេះនឹងត្រូវបានរៀបចំ និងចូលរួមពីប្រជាពលរដ្ឋ តាមរយៈយន្តការ គណនេយ្យភាព ​ ៤. លក្ខខណ្ឌគាំទ្រសម្រាប់ការកែលម្អការផ្តល់សេវា នឹងត្រូវបានពង្រឹងបន្ថែមតាមរយៈការបង្កើតបណ្តាញសិក្សារៀនសូត្រពីគ្នា (peer-learning networks) និងការអភិវឌ្ឍវគ្គបណ្តុះបណ្តាលជាប្រព័ន្ធ និងលទ្ធផលទី៥. ការពិនិត្យឡើងវិញ និងការអនុវត្តគោលនយោបាយ (ឧទាហរណ៍ តាមរយៈគោលការណ៍ណែនាំ និងសៀវភៅណែនាំ)៕