កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យមើលនូវលទ្ធផលសម្រេចបាននៃគោលបំណងគម្រោង និងកម្មវិធីនៃបេសកម្មគាំទ្រការអនុវត្តគម្រោង ព្រមទាំងផែនការសកម្មភាពដែលបានព្រមព្រៀងគ្នាកាលពីដំណើរបេសកម្មគាំទ្រការអនុវត្តគម្រោងលើកទី១១ នាពេលកន្លងមក។

ក្នុងសុន្ទរកថាបើកកិច្ចប្រជុំ ឯកឧត្តម ចាន់ សុធា បានថ្លែងអំណរគុណចំពោះក្រសួង ស្ថាប័នពាក់ព័ន្ធ អង្គការសង្គមស៊ីវិល និងដៃគូអភិវឌ្ឍន៍ទាំងអស់ ជាពិសេសរដ្ឋាភិបាលអូស្ត្រាលី និងធនាគារពិភពលោក ដែលបានគាំទ្រ និងចូលរួមចំណែកអនុវត្តការងារគណនេយ្យភាពសង្គម នាពេលកន្លងមក។ ឯកឧត្តមក៏បានលើកឡើងបន្ថែមទៀតថា បេសកកម្មគាំទ្រការអនុវត្តគម្រោងលើកទី១២ របស់ធនាគារពិភពលោកនេះ ពិតជាមានសារៈសំខាន់ ដើម្បីវាយតម្លៃលើលទ្ធផលសម្រេចបាន កំណត់នូវបញ្ហាប្រឈម និងដំណោះស្រាយសមស្របព្រមទាំងលើកឡើងនូវសកម្មភាពជាអាទិភាពនានាក្នុងការធានាឱ្យគម្រោងអាចសម្រេចបានស្របទៅតាមគោលបំណងរបស់គម្រោង ជាពិសេសធានានូវនិរន្តរភាពការងារគណនេយ្យភាពសង្គមនៅថ្នាក់ឃុំ សង្កាត់ក្នុងភាពជាម្ចាស់របស់ក្រសួង ស្ថាប័ន រដ្ឋបាលថ្នាក់ក្រោមជាតិ និងអង្គភាពផ្តល់សេវាក្នុងការបន្តអនុវត្តការងារគណនេយ្យភាពសង្គម បន្ទាប់ពីការបញ្ចប់ការគាំទ្ររបស់ដៃគូអភិវឌ្ឍន៍ និងអង្គការសង្គមស៊ីវិល។

ជាមួយគ្នានេះ លេខាធិការដ្ឋាន គ.ជ.អ.ប. បាននិងកំពុងរៀបចំនូវផែនការអនុវត្តគណនេយ្យភាពសង្គម ដំណាក់កាលទី៣ (២០២៦-២០៣០) ដែលផែនទីបង្ហាញផ្លូវក្នុងការអនុវត្តការងារគណនេយ្យភាពសង្គមរយៈពេល៥ឆ្នាំបន្តទៀត ដើម្បីធានាឱ្យការអនុវត្តការងារគណនេយ្យភាពសង្គម បន្តរួមចំណែកយ៉ាងសំខាន់ដល់ការលើកកម្ពស់ការផ្តល់សេវាសាធារណៈ និងការអភិវឌ្ឍនៅមូលដ្ឋាន ប្រកបដោយគុណភាព ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ស្របតាមកំណែទម្រង់វិមជ្ឈការ និងវិសហមជ្ឈការ និងផែនការអនុវត្តដំណាក់កាលទី២ (ឆ្នាំ២០២៦–២០៣០) នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ (កជទី២) ព្រមទាំងអាចរួមចំណែកសម្រេចឱ្យបាននូវចក្ខុវិស័យរបស់រាជរដ្ឋាភិបាលកម្ពុជា ដោយប្រែក្លាយប្រទេសកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

ទន្ទឹមនឹងនេះ ការងារគណនេយ្យភាពសង្គមត្រូវបានចាត់ទុកជាកិច្ចការដ៏មានសារៈសំខាន់មួយរបស់រាជរដ្ឋាភិបាល តាមរយៈការកំណត់ជាយន្តការ និងសូចនាករវាស់វែងនានា ដូចជា៖

១). សូចនាករវាស់វែង និងវាយតម្លៃលើអង្គភាពផ្តល់សេវាសាធារណៈគំរូនៃវិស័យអប់រំ និងវិស័យសុខាភិបាល។

២). យន្តការក្នុងការត្រួតពិនិត្យ និងវាយតម្លៃលើការអនុវត្តមុខងាររបស់រដ្ឋបាលថ្នាក់ក្រោមជាតិ។

៣). យន្តការមួយក្នុងចំណោមយន្តការនានានៃយុទ្ធសាស្រ្តអភិវឌ្ឍន៍រដ្ឋបាលឃុំ សង្កាត់។

៤). យន្តការក្នុងការលើកកម្ពស់ការបំពេញការងារ និងការផ្តល់សេវាសាធារណៈប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ដោយបានលើកឡើងដោយរដ្ឋបាលឃុំ សង្កាត់ និងថ្នាក់ដឹកនាំនាសន្និបាតឃុំ សង្កាត់ អាណត្តិទី៥។

តាមរយៈមតិចំណាប់អារម្មណ៍របស់តំណាងដៃគូអភិវឌ្ឍន៍ ក៏បានបង្ហាញនូវក្ដីសោមនស្សរីករាយដែលបានក្លាយជាផ្នែកមួយយ៉ាងសំខាន់ក្នុងការចូលរួមចំណែកគាំទ្រដល់ដំណើរការកំណែទម្រង់វិមជ្ឈការ និងវិសហមជ្ឈការ ជាពិសេសទៅលើគម្រោងដែលគាំទ្រដល់ការអនុវត្តការងារគណនេយ្យភាពសង្គម ហើយសង្ឃឹមជឿជាក់ថា ការងារគណនេយ្យភាពសង្គមនេះនឹងនៅតែបន្តទៅមុខប្រកបដោយនិរន្តភាព។

គួរជម្រាបជូនផងដែរថា បេសកកម្មគាំទ្រការអនុវត្តគម្រោងគណនេយ្យភាពសង្គមរបស់ធនាគារពិភពលោក លើកទី១២នេះ បានកំណត់យកខេត្តគោលដៅចំនួន ២ គឺខេត្តបន្ទាយមានជ័យ និងខេត្តបាត់ដំបង ដើម្បីពិនិត្យមើលនូវវឌ្ឍនភាព បញ្ហាប្រឈម និងរៀបចំផែនការសកម្មភាពបន្ទាប់ ដើម្បីធានាពង្រឹងការរអនុវត្តគម្រោង ក៏ដូចជាការងារគណនេយ្យភាពសង្គមទាំងផ្នែកផ្គត់ផ្គង់ និងផ្នែកតម្រូវការឱ្យកាន់តែមានប្រសិទ្ធភាព និងប្រសិទ្ធផល។

កិច្ចប្រជុំពិភាក្សានេះ មានការអញ្ជើញចូលរួមពីតំណាងលេខាធិការដ្ឋាន គ.ជ.អ.ប. ក្រសួងមហាផ្ទៃ ក្រសួងអប់រំ យុវជន និងកីឡា ក្រសួងសុខាភិបាល ក្រសួងសេដ្ឋកិច្ច និងហិរញ្ញវត្ថុ ធនាគារពិភពលោក ស្ថានទូតអូស្រ្តាលីប្រចាំកម្ពុជា និងអង្គការទស្សនៈពិភពលោកអន្តរជាតិ សរុបចំនួន ២១រូប ស្រី៧រូប។