សិក្ខាសាលានេះ រៀបចំឡើងដោយលេខាធិការដ្ឋាន គ.ជ.អ.ប. សហការជាមួយក្រសួងកិច្ចការនារី និងមានការគាំទ្របច្ចេកទេសពីកម្មវិធីធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋនៅប្រទេសកម្ពុជាដំណាក់កាលទី២ (GIZ-ISDII) ដោយមានការអញ្ជើញចូលរួមពីថ្នាក់ដឹកនាំ និងមន្ត្រីបច្ចេកទេសនៃលេខាធិការដ្ឋាន គ.ជ.អ.ប. តំណាងក្រសួងកិច្ចការនារី ព្រមទាំងតំណាងរដ្ឋបាលរាជធានី-ខេត្ត (រាជធានីភ្នំពេញ បាត់ដំបង ស្ទឹងត្រែង កណ្តាល និងកំពត) រដ្ឋបាលក្រុង ស្រុក ខណ្ឌ ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារ (គ.ក.ស.ក) អភិបាលរងទទួលបន្ទុកការងារយេនឌ័រ និងកិច្ចការសង្គម ប្រធានមន្ទីរកិច្ចការនារីរាជធានី-ខេត្ត និងថ្នាក់ដឹកនាំ មន្ត្រីជំនាញនៃអង្គភាពពាក់ព័ន្ធនៅថ្នាក់ក្រោមជាតិ សរុបចំនួន ៥១រូប (ស្រ្តី ៣០រូប)។

នាឱកាសនៃសិក្ខាសាលាក៏មានមតិចំណាប់អារម្មណ៍ពីដៃគូអភិវឌ្ឍ តំណាងដោយ លោក ម៉ែន គុណរ័ត្ន ប្រធានក្រុមការងារវិមជ្ឈការនៃកម្មវិធីធ្វើឱ្យប្រសើរឡើងដល់ការផ្តល់សេវាជូនប្រជាពលរដ្ឋនៅប្រទេសកម្ពុជាដំណាក់កាលទី២ (GIZ-ISDII) ដោយលោកបានធ្វើការគូសបញ្ជាក់ពីសារៈសំខាន់នៃសិក្ខាសិលា៖ «ការលើកកម្ពស់តួនាទីស្ត្រីមិនត្រឹមតែជាកិច្ចការសមភាពយេនឌ័រប៉ុណ្ណោះទេ ប៉ុន្តែជាកត្តាចាំបាច់ក្នុងការបង្កើនប្រសិទ្ធភាពការងារ និងការផ្តល់សេវាសាធារណៈនៅថ្នាក់ក្រោមជាតិ។ ការបង្កើតបរិយាកាសការងារមេត្រីភាព និងអំណោយផល នឹងជួយជំរុញឱ្យស្ត្រីមានឱកាសពេញលេញក្នុងការបញ្ចេញសមត្ថភាព ភាពជាអ្នកដឹកនាំ និងចូលរួមធ្វើសេចក្តីសម្រេចចិត្តសំខាន់ៗប្រកបដោយទំនុកចិត្ត»។

លោក ខោល យុទ្ធលី បានសម្តែងនូវការស្វាគមន៍យ៉ាងកក់ក្តៅ មានមតិបើកសិក្ខាសាលា និងថ្លែងអំណរគុណយ៉ាងជ្រាលជ្រៅជូនចំពោះតំណាងក្រសួង-ស្ថាប័ន ដៃគូអភិវឌ្ឍន៍ និងតំណាងរដ្ឋបាលថ្នាក់ក្រោមជាតិទាំងអស់ដែលបានចូលរួម។ លោកបានគូសបញ្ជាក់ថា រាជរដ្ឋាភិបាលកម្ពុជា តែងតែចាត់ទុក «ស្ត្រីជាឆ្អឹងខ្នងនៃសេដ្ឋកិច្ច និងសង្គមជាតិ» ហើយការលើកកម្ពស់សមភាពយេនឌ័រ គឺជាអាទិភាពគន្លឹះមួយក្នុងយុទ្ធសាស្ត្របញ្ចកោណ-ដំណាក់កាលទី១។ លោកបានបន្ថែមថា៖ «ការបង្កើនចំនួនស្ត្រីក្នុងមុខតំណែងគ្រប់គ្រង មិនមែនគ្រាន់តែជាការបំពេញតួលេខភាគរយនោះទេ ប៉ុន្តែជាការបើកឱកាសឱ្យស្ត្រីបានប្រើប្រាស់ចំណេះដឹង សមត្ថភាព និងបទពិសោធន៍ ក្នុងការចូលរួមធ្វើសេចក្តីសម្រេចចិត្ត ដើម្បីអភិវឌ្ឍន៍មូលដ្ឋាន និងឆ្លើយតបទៅនឹងតម្រូវការរបស់ប្រជាពលរដ្ឋឱ្យកាន់តែមានប្រសិទ្ធភាព និងបរិយាបន្ន។ ទន្ទឹមនឹងនេះ ការបង្កើតបរិយាកាសការងារមេត្រីភាព នឹងក្លាយជាគ្រឹះយ៉ាងរឹងមាំក្នុងការធានាថា បុគ្គលិកជាស្ត្រីទទួលបានការគាំទ្រ ភាពកក់ក្តៅ និងសុវត្ថិភាពទាំងផ្លូវកាយ និងផ្លូវចិត្ត ក្នុងការបំពេញភារកិច្ចជូនរដ្ឋបាលថ្នាក់ក្រោមជាតិ»។

សូមបញ្ជាក់ថា សិក្ខាសាលានេះរៀបចំឡើងក្នុងគោលបំណងពិនិត្យ ពិភាក្សា និងប្រមូលធាតុចូលបន្ថែម សម្រាប់កែសម្រួលសេចក្តីព្រាងសេចក្តីណែនាំស្តីពីការបង្កើនចំនួនស្ត្រីក្នុងមុខតំណែងគ្រប់គ្រងនៅរដ្ឋបាលរាជធានី ខេត្ត ក្រុង ស្រុក ខណ្ឌ និងសេចក្តីព្រាងសេចក្តីណែនាំស្តីពីការបង្កើតបរិយាកាសមេត្រីភាព និងលក្ខខណ្ឌអំណោយផលនៅកន្លែងបំពេញការងារ និងការអនុវត្តតួនាទីភារកិច្ចរបស់បុគ្គលិកនៅរដ្ឋបាលថ្នាក់ក្រោមជាតិ ឱ្យមានលក្ខណៈគ្រប់ជ្រុងជ្រោយ អាចអនុវត្តបាន និងឆ្លើយតបស្របតាមស្ថានភាពជាក់ស្តែង ព្រមទាំងតម្រូវការរបស់រដ្ឋបាលថ្នាក់ក្រោមជាតិ។

ការរៀបចំសេចក្តីណែនាំទាំងពីរនេះ គឺជាជំហានគន្លឹះក្នុងការជំរុញការអនុវត្ត «ផែនការយុទ្ធសាស្ត្រស្តីពីការបង្កើនចំនួនស្ត្រីក្នុងមុខតំណែងគ្រប់គ្រងនៅរដ្ឋបាលថ្នាក់ក្រោមជាតិ (២០២៤-២០២៨)» ឱ្យមានប្រសិទ្ធភាពខ្ពស់ និងសម្រេចបានតាមគោលដៅរំពឹងទុក ដើម្បីលើកកម្ពស់សមភាពយេនឌ័រ បរិយាបន្ន សមធម៌សង្គម និងពង្រឹងភាពអង់អាចដល់ស្ត្រី ស្របតាមទិសដៅនៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិ ដំណាក់កាលទី២ (២០២១-២០៣០)៕