ដំណើរទស្សនកិច្ចនេះជាលើកទី៣ នៃកម្មវិធីទស្សនកិច្ចចែករំលែក និងផ្លាស់ប្តូរបទពិសោធន៍ការងារគណនេយ្យភាពសង្គម (PLE) មានគោលបំណងពង្រឹងសមត្ថភាពរបស់រដ្ឋបាលថ្នាក់ក្រោមជាតិ អ្នកផ្តល់សេវា និងអ្នកសម្របសម្រួលគណនេយ្យភាពសហគមន៍ ដើម្បីបន្តអនុវត្តដំណើរការគណនេយ្យភាពសង្គមនៅថ្នាក់ឃុំសង្កាត់ប្រកបដោយនិរន្តរភាព បន្ទាប់ពីការគាំទ្ររបស់ដៃគូអភិវឌ្ឍន៍ត្រូវបានបញ្ចប់នៅចុងឆ្នាំ២០២៦នាពេលខាងមុខ។

ក្នុងដំណើរទស្សនកិច្ចនេះ គណៈប្រតិភូមកពីខេត្តកែប និងខេត្តព្រៃវែង បានចុះទៅកាន់សាលាបឋមសិក្សាព្រហូត មណ្ឌលសុខភាពក្រាំងលាវ និងសាលាឃុំក្រាំងលាវ ដើម្បីសិក្សាស្វែងយល់ពីដំណើរការនៃការអនុវត្តការងារគណនេយ្យភាពសង្គម។ ខ្លឹមសារសិក្សាស្វែងយល់រួមមាន ការតម្រឹមក្របខណ្ឌពេលវេលានៃការអនុវត្តវដ្តសកម្មភាពថ្មីនៃការអនុវត្តការងារគណនេយ្យភាពសង្គម ឱ្យស្របនឹងការកសាងផែនការវិនិយោគបីឆ្នាំរំកិលរបស់ឃុំ និងការទទួលស្គាល់បណ្តាញសម្របសម្រួលគណនេយ្យភាពសហគមន៍ និងការលើកម្ពស់សមភាពយេនឌ័រ និងបរិយាបន្នសង្គម ក្នុងគោលដៅជម្រុញនិរន្តរភាពនៃការអនុវត្តការងារគណនេយ្យភាពសង្គមនៅថ្នាក់ឃុំ សង្កាត់។

ដំណើរទស្សនកិច្ចនេះ មានការអញ្ជើញចូលរួមពីឯកឧត្តម លោកជំទាវ លោក លោកស្រី ដែលជាតំណាងលេខាធិការដ្ឋាន គ.ជ.អ.ប. អភិបាលរងនៃគណៈអភិបាលខេត្តតាកែវ ខេត្តព្រៃវែង និងខេត្តកែប អភិបាលស្រុកបាទី តំណាងស្ថានទូតអូស្ត្រាលីប្រចាំកម្ពុជា អង្គការទស្សនៈពិភពលោកអន្តរជាតិ ក្រុមការងារគណនេយ្យភាពសង្គមថ្នាក់ខេត្ត ស្រុក ក្រុមប្រឹក្សាឃុំ នាយកសាលាបឋមសិក្សា ប្រធានមណ្ឌលសុខភាព និងអ្នកសម្របសម្រួលការងារគណនេយ្យភាពសហគមន៍ សរុបប្រមាណ ៧៦នាក់ ក្នុងនោះស្រី ១៧នាក់៕