កិច្ចប្រជុំនេះរៀបចំឡើងក្នុងគោលបំណងផ្តល់ការគាំទ្រ និងពិភាក្សាលម្អិតជាមួយការិយាល័យជំនាញទាំង១៤ នៃរដ្ឋបាលស្រុកឯកភ្នំ ដើម្បីបង្កើតជាមូលដ្ឋានគំរូសម្រាប់រដ្ឋបាលក្រុង ស្រុក និងខណ្ឌផ្សេងទៀត ក្នុងការជំរុញ និងពង្រឹងការរៀបចំកំណត់មុខតំណែងវិជ្ជាជីវៈ ព្រមទាំងការពិពណ៌នាមុខតំណែងនានារបស់រដ្ឋបាលថ្នាក់ក្រោមជាតិឱ្យបានទាន់ពេលវេលា និងប្រកបដោយប្រសិទ្ធភាព ស្របតាមអនុក្រឹត្យលេខ ៧៦ អនក្រ.បក ចុះថ្ងៃទី២០ ខែមេសា ឆ្នាំ២០២៣ ស្តីពីការកំណត់មុខតំណែងវិជ្ជាជីវៈ និងការពិពណ៌នាមុខតំណែងនានាក្នុងរចនាសម្ព័ន្ធរបស់រដ្ឋបាលក្រុង ស្រុក ខណ្ឌ។

មុនផ្តល់កិច្ចគាំទ្រ និងពិភាក្សាលម្អិតជាមួយការិយាល័យជំនាញ ក៏មានការធ្វើបទបង្ហាញដល់មន្រ្តីចំណុះរដ្ឋបាលស្រុក ស្តីពីការរៀបចំកំណត់មុខតំណែងវិជ្ជាជីវៈ និងការពិពណ៌នាមុខតំណែងនានារបស់រដ្ឋបាលក្រុង ស្រុក ខណ្ឌ​ ពីតំណាងលេខាធិការដ្ឋាន គ.ជ.អ.ប. ផងដែរ។

កិច្ចប្រជុំនេះមានការអញ្ជើញចូលរួមពី តំណាងក្រសួងមុខងារសាធារណៈ តំណាងអគ្គនាយកដ្ឋានរដ្ឋបាលនៃក្រសួងមហាផ្ទៃ អភិបាល អភិបាលរងទទួលបន្ទុក លោក-លោកស្រីក្រុមការងារវិភាគមុខងារតាមការិយាល័យ តំណាងការិយាល័យ និងអង្គភាពចំណុះទាំង១៣ មន្ត្រីបច្ចេកទេសពាក់ព័ន្ធនៃរដ្ឋបាលស្រុកឯកភ្នំ និងក្រុមការងារនៃលេខាធិការដ្ឋាន គ.ជ.អ.ប. សរុបចំនួន ៦៩រូប (ស្ត្រី ២៤រូប)។ ក្រុមការងារលេខាធិការដ្ឋាន គ.ជ.អ.ប. បានសម្របសម្រួលបែកចែកជាពីរក្រុមដើម្បីផ្តល់ការគាំទ្រ និងពិភាក្សាលម្អិតជាមួយការិយាល័យជំនាញដោយមួយក្រុមមានចំនួន ៧ការិយាល័យ អង្គភាពក្រោមចំណុះរដ្ឋបាលស្រុកឯកភ្នំ នៃខេត្តបាត់ដំបង។