កិច្ចប្រជុំនេះ មានគោលបំណងពិនិត្យ ពិភាក្សា និងសម្រេចទៅលើខ្លឹមសារឯកសារទស្សនទាន ដោយផ្តោតលើគោលបំណង លទ្ធផលរំពឹងទុក តំបន់គោលដៅ វិធីសាស្រ្ត និងក្របខណ្ឌពេលវេលានៃការអនុវត្តសាកល្បងថ្នាលសិក្សាពីចម្ងាយ របស់ គ.ជ.អ.ប. សម្រាប់ធានាឱ្យការអនុវត្តសាកល្បងទទួលបានលទ្ធផលល្អប្រសើ និងអាចពង្រីកការអនុវត្តនៅដំណាក់កាលបន្ទាប់ ព្រមទាំងធានាឱ្យការអនុវត្តការងារគណនេយ្យភាពសង្គមរបស់រដ្ឋបាលថ្នាក់ក្រោមជាតិអាចប្រព្រឹត្តទៅប្រកបដោយប្រសិទ្ធភាព និងប្រសិទ្ធផល។

ជាលទ្ធផលនៃកិច្ចប្រជុំ លេខាធិការដ្ឋាន គ.ជ.អ.ប. និងសាលាជាតិរដ្ឋបាលមូលដ្ឋាន បានឯកភាពលើឯកសារទស្សនទាន និងជ្រើសរើសតំបន់គោលដៅចំនួន ៧ ក្រុង ស្រុក ក្នុងខេត្តចំនួន ៣ រួមមាន ខេត្តបាត់ដំបង ខេត្តកំពង់ស្ពឺ និងខេត្តកំពត សម្រាប់ការអនុវត្តសាកល្បងថ្នាលសិក្សាពីចម្ងាយនេះ ដោយផ្តោតលើអង្គភាពផ្តល់សេវារួមមាន រដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាព។

គួរបញ្ជាក់ថា ថ្នាលសិក្សាពីចម្ងាយរបស់ គ.ជ.អ.ប. (NCDD E-Learning Platform) ត្រូវបានបង្កើតឡើងក្នុងគោលបំណងផ្តល់ឱកាសក្នុងការសិក្សាពីចម្ងាយតាមប្រព័ន្ធឌីជីថល ដើម្បីលើកកម្ពស់ និងអភិវឌ្ឍសមត្ថភាពដល់មន្ត្រីរដ្ឋបាលថ្នាក់ជាតិ រដ្ឋបាលថ្នាក់ក្រោមជាតិ អង្គភាពផ្តល់សេវា និងភាគីពាក់ព័ន្ធនានា។ ថ្នាលសិក្សាពីចម្ងាយនេះ ត្រូវបានអភិវឌ្ឍឡើងដោយមានការគាំទ្រពីគម្រោង «សមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ ដំណាក់កាលទី២» ក្រោមហិរញ្ញប្បទានឥតសំណងពីរដ្ឋាភិបាលអូស្ត្រាលី តាមរយៈមូលនិធិបរធនបាលកិច្ច (Trust Fund) ដែលសម្របសម្រួលដោយធនាគារពិភពលោក។ ការអនុវត្តសាកល្បងនេះ នឹងក្លាយជាជំហានសំខាន់ក្នុងការពង្រឹងការប្រើប្រាស់បច្ចេកវិទ្យាឌីជីថលសម្រាប់ការអភិវឌ្ឍសមត្ថភាព និងការសិក្សាពីចម្ងាយ ព្រមទាំងជាមូលដ្ឋានសម្រាប់ការពង្រីកការប្រើប្រាស់ថ្នាលសិក្សាពីចម្ងាយទៅកាន់តំបន់ និងក្រុមគោលដៅផ្សេងទៀតនាពេលអនាគត៕