ជាគម្រោងថ្នាក់តំបន់របស់ UNDP ដែលអនុវត្តនៅប្រទេសកម្ពុជា និងប្រទេសភូមា។ គម្រោងមានគោលដៅការកសាងភាពធន់ទៅនឹងការប្រែប្រួលអាកាសធាតុក្នុងវិស័យកសិកម្មនៅប្រទេសកម្ពុជា តាមរយៈយន្តការសំខាន់ៗ ៣យ៉ាង ៖ (១)​ការគាំទ្រការអនុវត្តបច្ចេកទេសកសិកម្មដែលធន់នឹងការប្រែប្រួលអាកាសធាតុ (២)ការធ្វើឱ្យប្រសើរឡើងនូវសង្វាក់ផលិតកម្មកសិកម្ម​ (៣) ការលើកកម្ពស់ និងពង្រីកការប្រើប្រាស់បច្ចេកវិទ្យាថាមពលពន្លឺព្រះអាទិត្យសម្រាប់បូមទឹក និងផ្គត់ផ្គង់ថាមពលដល់ទីផ្សារ។

ដើម្បីសម្រេចបានគោលបំណងខាងលើ គម្រោងនេះនឹងអនុវត្តនៅលើលទ្ធផលរំពឹងទុក២សំខាន់ៗដូចខាងក្រោម៖ 

លទ្ធផលរំពឹងទុកទី១៖ បង្កើនផលិតភាពកសិករខ្នាតតូចតាមរយៈការអនុវត្តបច្ចេកវិទ្យាកសិកម្មទំនើប និងធ្វើឱ្យប្រសើរឡើងនូវសង្វាក់ផលិតកម្ម៖ គម្រោងនឹងវិនិយោគលើការសាងសង់ផ្សារកសិកម្មចំនួន៤ កន្លែង ដែលនឹងក្លាយជាកន្លែងប្រមូលផ្តុំភ្នាក់ងារទីផ្សារតាមមូលដ្ឋាន និងភ្ជាប់ទំរូបទំនងរវាងកសិករ និងអ្នកទិញ ដើម្បីដោះស្រាយនូវការខកខាននៃលទ្ធផលទីផ្សារ និងបណ្តាញចែកចាយដែលពុំមានការរៀបចំ។ លើសពីនេះទៀត កសិករគោលដៅ នឹងអាចចែករំលែកគ្នាទៅវិញទៅមក នូវធាតុចូលកសិកម្ម ​(ឧទាហរណ៍ដូចជា ពូជធន់នឹងការប្រែប្រួលអាកាសធាតុ) និងធាតុចេញកសិកម្ម (ឧទាហរណ៍ដូចជា ផលិតផលកសិកម្ម)​រួមទាំងទទួលបានជំនួយផ្នែកបច្ចេកទេសកសិកម្មទំនើបផងដែរ។

លទ្ធផលរំពឹងទុកទី២៖ បង្កើនការប្រើប្រាស់ប្រព័ន្ធបូមទឹកដោយថាមពលពន្លឺព្រះអាទិត្យក្នុងវិស័យកសិកម្ម៖ ដើម្បីទាញយកសក្តានុពលទីផ្សារប្រព័ន្ធបូមទឹកដោយប្រើថាមពលពន្លឺព្រះអាទិត្យនៅប្រទេសកម្ពុជា មូលនិធិប្រកួតប្រជែងមួយនឹងត្រូវបានបង្កើតឡើង ដើម្បីលើកកម្ពស់គំរូអាជីវកម្មប្រកបដោយភាពច្នៃប្រឌិត និងបង្កើតដំណោះស្រាយប្រព័ន្ធបូមទឹកដោយប្រើថាមពលពន្លឺព្រះអាទិត្យ។ វគ្គបណ្តុះបណ្តាលត្រូវបានធ្វើឡើងដល់ប្រតិបត្តិករបច្ចុប្បន្ន និងថ្មី និងសហគមន៍មូលដ្ឋាន ដែលប្រើប្រាស់ដំណោះស្រាយប្រព័ន្ធបូមទឹកដោយប្រើថាមពលពន្លឺព្រះអាទិត្យ ដើម្បីបង្កើនសមត្ថភាពមុខងាររបស់ពួកគេ រួមជាមួយការផ្សព្វផ្សាយព័ត៌មានអំពីតម្រូវការប្រព័ន្ធបូមទឹកដោយប្រើថាមពលពន្លឺព្រះអាទិត្យ ដល់អ្នកពាក់ព័ន្ធនឹងបង្កើនទំនុកចិត្តនៃទម្រង់បែបបទទីផ្សារ។ ការប្រមូលផ្តុំយន្តការទាំងពីរនេះនឹងត្រួសត្រាយផ្លូវសម្រាប់ដំណោះស្រាយប្រព័ន្ធបូមទឹកដោយប្រើថាមពលពន្លឺព្រះអាទិត្យបន្ថែមដែលត្រូវតំឡើង និងដំណើរការដើម្បីទទួលបាននូវប្រភពទឹកប្រកបដោយនិរន្តរភាព។