ដំណើរទស្សនកិច្ចនេះ មានគោលបំណង ដើម្បីស្វែងយល់អំពីការគ្រប់គ្រង និងអនុវត្តលើកិច្ចការផែនការ ហិរញ្ញវត្ថុ កិច្ចលទ្ធកម្ម សវនកម្ម និងការអនុវត្តគម្រោង សកម្មភាពដែលគាំទ្រដោយមូលនិធិស្រុក និងមូលនិធិឃុំ សម្រាប់ធានាដល់ការរៀបចំគម្រោង SCALED ឱ្យកាន់មានប្រសិទ្ធភាព និងមានលក្ខណៈគ្រប់ជ្រុងជ្រោយ ដែលរួមចំណែកដល់ការអនុវត្តកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ សំដៅលើកកម្ពស់ការបំពេញមុខងារ និងការអភិវឌ្ឍសេដ្ឋកិច្ចមូលដ្ឋានធន់នឹងការប្រែប្រួលអាកាសធាតុ របស់រដ្ឋបាលថ្នាក់មូលដ្ឋាន ស្របតាមច្បាប់ លិខិតបទដ្ឋានគតិយុត្ត និងឯកសារបច្ចេកទេសនានា។

ដំណើរទស្សនកិច្ចនេះ មានការអញ្ជើញចូលរួមពី តំណាងលេខាធិការដ្ឋាន គ.ជ.អ.ប. គណៈប្រតិភូធនាគារពិភពលោក ដោយបានជួបប្រជុំពិភាក្សាជាមួយក្រុមប្រឹក្សាស្រុក អភិបាល អភិបាលរងស្រុក នាយករដ្ឋបាលស្រុក ប្រធានការិយាល័យពាក់ព័ន្ធ មេឃុំ ក្រុមប្រឹក្សាឃុំ ស្មៀនឃុំ គណៈកម្មាធិការលទ្ធកម្ម គណៈកម្មាធិការផែនការ និងថវិកា ដែលមានសមាសភាពចូលរួមសរុបប្រមាណ៥០រូប ស្រី ០៦រូប។

សូមគូសបញ្ជាក់ផងដែរថា លេខាធិការដ្ឋាន គ.ជ.អ.ប. ជាភ្នាក់ងារអនុវត្តនៃគម្រោង «ជំរុញការអភិវឌ្ឍសេដ្ឋកិច្ចមូលដ្ឋានធន់នឹងការប្រែប្រួលអាកាសធាតុប្រកបដោយចីរភាព (SCALED)» ក្រោមហិរញ្ញប្បទានឥណទានពីធនាគារពិភពលោក ដើម្បីពង្រឹងការអភិវឌ្ឍហេដ្ឋារចនាសម្ព័ន្ធខ្នាតតូច ការអភិវឌ្ឍសេដ្ឋកិច្ចមូលដ្ឋានដែលធន់នឹងការប្រែប្រួលអាកាសធាតុ និងលើកកម្ពស់អភិបាលកិច្ចរបស់រដ្ឋបាលមូលដ្ឋាន ស្របទៅតាមចក្ខុវិស័យ គោលបំណង និងគោលដៅនៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដំណាក់កាលទី២ របស់រាជរដ្ឋាភិបាលកម្ពុជា៕