ក្នុងដំណើរទស្សនកិច្ចនេះ ឯកឧត្តម មូល ធន អភិបាលរងខេត្តបាត់ដំបងបានស្វាគមន៍យ៉ាងកក់ក្តៅចំពោះគណៈប្រតិភូ និងភ្ញៀវកិត្តិយសទាំងអស់ ព្រមទាំងបានគូសបញ្ជាក់ថា ការដាក់បញ្ចូលការងារគណនេយ្យភាពសង្គមទៅក្នុងកម្មវិធីជាតិ ដំណាក់កាលទី២ គឺជាការបង្ហាញពីទស្សនវិស័យវែងឆ្ងាយរបស់រាជរដ្ឋាភិបាល ក្នុងការពង្រឹងអភិបាលកិច្ចថ្នាក់ក្រោមជាតិ លើកកម្ពស់គុណភាពសេវាសាធារណៈ។

ក្នុងឱកាសនោះ គណៈប្រតិភូបានចុះទស្សនកិច្ចសិក្សានៅ មណ្ឌលសុខភាពព្រៃតូច និងសាលាបឋមសិក្សាប៊ីលណាន់ស៊ីកូនខ្លុង និង រដ្ឋបាលឃុំព្រៃតូច ដើម្បីសិក្សាស្វែងយល់អំពីការអនុវត្តការងារគណនេយ្យភាពសង្គម និងសមិទ្ធផលដែលសម្រេចបានតាមរយៈការអនុវត្តផែនការសកម្មភាពរួមស្តីពីការងារគណនេយ្យភាពសង្គម (JAAP) និងការចូលរួមយ៉ាងសកម្មរបស់ប្រជាពលរដ្ឋ ដូចជា៖

ទី១. ការបន្ស៊ីក្របខ័ណ្ឌពេលវេលានៃការបង្កើត JAAP ជាមួយនឹងការរៀបចំ CIP អាចប្រព្រឹត្ត ទៅបានតាមបច្ចេកទេស និងទាន់ពេលវេលា។

ទី២. ការចូលរួមគាំទ្រដល់ការអនុវត្តការងារគណនេយ្យភាពសង្គម របស់រដ្ឋបាលខេត្ត រដ្ឋបាល ស្រុក និងអង្គភាពផ្តល់សេវាមានភាពល្អប្រសើរ តាមរយៈការពង្រឹងការផ្សព្វផ្សាយព័ត៌មាន ការបង្កើនការចូលរួមរបស់ប្រជាពលរដ្ឋ និងការអនុវត្ត JAAP ដើម្បីឆ្លើយតបទៅនឹងតម្រូវការរបស់ សហគមន៍មូលដ្ឋាន និងលើកកម្ពស់ការផ្តល់សេវាសាធារណៈ។

ទី៣. ការប្តេជ្ញាចិត្តខ្ពស់របស់រដ្ឋបាលខេត្ត រដ្ឋបាលស្រុក រដ្ឋបាលឃុំ និងអង្គភាពផ្តល់សេវាក្នុង

ការបែងចែក ប្រើប្រាស់ថវិកា និងមូលនិធិរបស់ខ្លួនក្នុងការគាំទ្រការងារគណនេយ្យភាពសង្គម នាពេលកន្លងមក និងពេលអនាគត។

ទី៤. ការបន្តគាំទ្រដល់អ្នកសម្របសម្រួលគណនេយ្យភាពសហគមន៍ (CAF) ក្នុងការសហការ សម្របសម្រួល និងកៀរគរការចូលរួមរបស់ប្រជាពលរដ្ឋ និងអ្នកផ្តល់សេវាក្នុងដំណើរការ គណនេយ្យភាពសង្គម។

ទី៥. ការដាក់បញ្ចូល JAAP ទៅក្នុងកម្មវិធីវិនិយោគបីឆ្នាំរកិលឃុំ និងការគាំទ្រដល់ការអនុវត្ត JAAP ឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋានបានល្អប្រសើរ។

ទី៦. ការពង្រឹងការប្រើប្រាស់ប្រព័ន្ធឌីជីថល និងបណ្តាញសង្គមរបស់អង្គភាពផ្តល់សេវានីមួយៗ និងអ្នកសម្របសម្រួលគណនេយ្យភាពសហគមន៍ ក្នុងការផ្សព្វផ្សាយព័ត៌មាន និងការប្រាស្រ័យ ទាក់ទងជាមួយប្រជាពលរដ្ឋ។

ថ្លែងក្នុងកម្មវិធីដំណើរទស្សនកិច្ចនេះ ឯកឧត្តម ឆឹម សំអ៊ែល បានគូសបញ្ជាក់ អំពីសារៈសំខាន់នៃការបន្ស៊ីអនុវត្តការងារគណនេយ្យភាពសង្គមជាមួយការរៀបចំកម្មវិធីវិនិយោគបីឆ្នាំរំកិលរបស់ឃុំ-សង្កាត់ ដែលធានានិរន្តរភាព និងភាពជាម្ចាស់របស់រដ្ឋបាលថ្នាក់ក្រោមជាតិ។ ឯកឧត្តមបានបន្ថែមថា ការអនុវត្តការងារគណនេយ្យភាពសង្គម បានផ្តល់ឱកាសឱ្យប្រជាពលរដ្ឋអាចបញ្ចេញមតិយោបល់ ចូលរួមតាមដាន និងរួមចំណែកកែលម្អការផ្តល់សេវាសាធារណៈនៅមូលដ្ឋាន។

​

កម្មវិធីទស្សនកិច្ចនេះបានបង្ហាញយ៉ាងច្បាស់ថា ការអនុវត្តការងារគណនេយ្យភាពសង្គម (ISAF) មិនត្រឹមតែលើកកម្ពស់ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គមក្នុងការផ្តល់សេវាសាធារណៈប៉ុណ្ណោះទេ ប៉ុន្តែថែមទាំងជំរុញការចូលរួមរបស់ប្រជាពលរដ្ឋ ពង្រឹងនូវភាពជឿជាក់រវាងអាជ្ញាធរមូលដ្ឋាន និងសហគមន៍ និងឆ្លើយតបនឹងបញ្ហា តម្រូវការជាក់ស្តែងរបស់ប្រជាពលរដ្ឋ៕