ថ្លែងក្នុងសុន្ទរកថាបើកកម្មវិធី ឯកឧត្តម នី គឹមសាន បានមានប្រសាសន៍ថា៖ «តាមរយៈសិក្ខាសាលាស្តីពីការផ្សព្វផ្សាយលទ្ធផល និងបិទបញ្ចប់គម្រោង STA ដែលបានរៀបចំឡើងកាលទីថ្ងៃទី១៨ ខែកញ្ញា ឆ្នាំ២០២៥ ម្សិលមិញនេះ  យើងកត់សម្គាល់ឃើញថា គម្រោង STA បានអនុវត្តប្រកបដោយជោគជ័យ ស្របទៅតាមកិច្ចព្រមព្រៀងគម្រោង និងបានរួមចំណែកយ៉ាងធំធេងដល់កំណែទម្រង់វិមជ្ឈការ និងវិសហមជ្ឈការ ជាពិសេសបានផ្តល់លទ្ធភាពបន្ថែមដល់លេខាធិការដ្ឋាន គ.ជ.អ.ប. បង្កើនការសម្របសម្រួលជាមួយក្រសួង ស្ថាប័ននៅថ្នាក់ជាតិ រដ្ឋបាលថ្នាក់ក្រោមជាតិ ដៃគូអភិវឌ្ឍន៍ អង្គការសង្គមស៊ីវិល និងវិស័យឯកជន ក្នុងការអនុវត្តសកម្មភាពចាំបាច់នានាដែលបានកំណត់ក្នុងកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២ (កជទី២)។»

លោក NAGASE Kensuke អគ្គរាជទូត និងជាអនុប្រធានបេសកកម្មនៃស្ថានទូតជប៉ុនប្រចាំកម្ពុជាបានលើកឡើងថា៖ «ទោះបីជានេះជាលើកចុងក្រោយនៃកិច្ចប្រជុំក្រុមប្រឹក្សាគម្រោង STA តែរាជរដ្ឋាភិបាលជប៉ុននៅតែប្តេជ្ញាបន្តការគាំទ្រក្នុងការពង្រឹងគណនេយ្យភាព និងតម្លាភាពនៅកម្ពុជា ជាពិសេសលើការអង្កេតអភិបាលកិច្ច ដើម្បីធានាថារាល់មតិយោបល់របស់ប្រជាពលរដ្ឋ ត្រូវបានពិចារណាក្នុងការដាក់បញ្ជូលទៅក្នុងសកម្មភាពអភិវឌ្ឍនានានៅមូលដ្ឋាន»។

ស្របតាមមតិខាងលើ លោក Enrico Gaveglia តំណាង UNDP ប្រចាំកម្ពុជា និងជាសហប្រធានក្រុមប្រឹក្សាភិបាល សូមថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលជប៉ុន និងប្រជាជនជប៉ុន ចំពោះការគាំទ្រយ៉ាងមុតមាំ ចំពោះការអភិវឌ្ឍលទ្ធិប្រជាធិបតេយ្យរបស់ប្រទេសកម្ពុជា។ ការតាំងចិត្តចំពោះតម្លាភាព គណនេយ្យភាព និងការចូលរួមរបស់ប្រជាពលរដ្ឋ គឺជាសារសំខាន់មួយក្នុងការជំរុញឱ្យគម្រោងនេះទទួលបាននូវភាពជោគជ័យយ៉ាងត្រចះត្រចង់។ តំណាង UNDP ប្រចាំកម្ពុជា លោកសូមថ្លែងអំណរគុណជាពិសេសចំពោះការផ្តល់មូលនិធិដ៏សប្បុរសរបស់ប្រជាពលរដ្ឋជប៉ុន និង ជឿជាក់នូវការបន្តភាពជាដៃគូនាពេលអនាគត។

គូសបញ្ជាក់ផងដែរថា ដោយទទួលបានហិរញ្ញប្បទានឥតសំណងពីរាជរដ្ឋាភិបាលជប៉ុន  និងប្រជាជនជប៉ុន តាមរយៈកម្មវិធីអភិវឌ្ឍន៍សហប្រជាជាតិ(UNDP) ប្រចាំនៅកម្ពុជា លេខាធិការដ្ឋាន គ.ជ.អ.ប. បានអនុវត្តគម្រោង STA ក្នុងគោលបំណង ដើម្បីបង្កើនការចូលរួម និងការទទួលយោបល់ត្រលប់របស់ប្រជាពលរដ្ឋ ការបំពេញការងារ និងគណនេយ្យភាពរបស់រដ្ឋបាលថ្នាក់ក្រោមជាតិ និងការគាំទ្រការអនុវត្តគោលនយោបាយនៅថ្នាក់ជាតិ។