កម្មវិធីនេះបានសហការរៀបចំដោយក្រសួងធនធានទឹក និងឧតុនិយម រួមជា​មួយវិទ្យាស្ថាន​បណ្តុះបណ្តាល​ និងស្រាវជ្រាវ​ដើម្បីអភិវឌ្ឍន៍កម្ពុជា(វបសអ-CDRI) ដោយ​មានការគាំទ្រ​ថវិកាពីក្រសួងការបរទេសនិងពាណិជ្ជកម្មអូស្ត្រាលី និងមានវត្តមានចូលរួមពីឯកឧត្តម ដេរីក យីប (Derek Yip) ឯកអគ្គរដ្ឋទូតអូស្ត្រាលីប្រចាំកម្ពុជា ថ្នាក់​ដឹកនាំ​ជាន់ខ្ពស់​ជាវាគ្មិន​តំណាង​ក្រសួងធនធានទឹក និងឧតុនិយម ក្រសួងបរិស្ថាន ក្រសួងកសិកម្មរុក្ខាប្រមាញ់ និងនេសាទ ក្រសួងការបរទស និងក្រសួងពាណិជ្ជកម្ម តំណាងធនាគារពិភពលោក ធនាគារ​អភិវឌ្ឍន៍​អាស៊ី(ADB) អង្គការយូនីសេហ្វ ស្ថាប័នស្រាវជ្រាវ វិស័យឯកជន អង្គការសង្គមស៊ីវិល និងសហគមន៍មូលដ្ឋានជាច្រើនរូប។

កម្មវិធីនេះ បានប្រព្រឹត្តទៅក្រោមប្រធានបទសំខាន់ចំនួន២ គឺ ១- អភិបាលកិច្ចទឹក និង ២-សេវាទឹកស្អាតនិងអនាម័យ ដើម្បីរួមចំណែកដល់ការយល់ដឹងពីផលបច្ច័យនៃសន្តិសុខទឹក ភាពមិនប្រាកដប្រជានៃអាកាសធាតុ និងការដោះស្រាយបញ្ហាប្រឈមនានា ដោយ​មានការ​សម្របសម្រួលកិច្ចពិភាក្សាដោយលោកស្រីបណ្ឌិត អេង នេត្រា នាយិកាប្រតិបត្តិវិទ្យាស្ថាន CDRI។

ក្នុងនោះដែរ ឯកឧត្តម ជ័យ សម្បត្តិផល្លា បានមានប្រសាសន៍សំខាន់ចំនួន៣ចំនុច រួមមាន៖ (ទី១) នៅក្នុងការរៀបចំផែនការយុទ្ធសាស្រ្តអភិវឌ្ឍន៍ ​គ្រប់​ភាគីពាក់ព័ន្ធ​សូមគិត​គូបញ្ចូល​សមាសភាព​អាជ្ញាធរ​មូលដ្ឋាន​ថ្នាក់ក្រោម​ជាតិផង​ ពីព្រោះអាជ្ញាធរមូលដ្ឋានជាតួអង្គសំខាន់ និងជាអ្នកអនុវត្តផ្ទាល់រាល់គោលនយោបាយនានារបស់រាជរដ្ឋាភិបាល (ទី២) ស្នើ​ដល់ដៃ​គូអភិវឌ្ឍន៍​ អង្គការជាតិ និងអន្តរជាតិ និងសមាគមនានាចូលរួមចែករំលែក ចំណេះដឹង ជំនាញ និងបទពិសោធន៍ដែលខ្លួនបានអនុវត្ត ដើម្បី​ផ្តល់​ជាធាតុ​ចូលទៅ​ក្នុងការ​រៀបចំ​ផែនការ​យុទ្ធសាស្រ្ត​អភិវឌ្ឍន៍​ និងផែនទី​បង្ហាញផ្លូវ​ក្នុងការ​អភិវឌ្ឍន៍នានា និង (ទី៣) ចាំបាច់​ត្រូវការ​កៀរគរធនធានបន្ថែមលើការអនុវត្តសកម្មភាព ព្រោះទន្ទឹមនឹងមានផែនការល្អ យុទ្ធសាស្ត្រល្អ ក៏ត្រូវផ្សាភ្ជាប់ទៅនឹងធនធានហិរញ្ញវត្ថុ ដើម្បី​ទ្រទ្រង់​ដល់ការ​អនុត្តសកម្មភាព​ដែល​បានដាក់ចេញទាំងនោះ។

កម្មវិធីនេះ បានរៀបចំធ្វើឡើងក្នុងគោលបំណង ដើម្បី៖

១.ជួបជុំរវាងភាគីពាក់ព័ន្ធសំខាន់ៗដែលធ្វើការលើវិស័យទឹកក្នុងប្រទេសកម្ពុជានិងថ្នាក់តំបន់ ដើម្បីចែករំលែក និងពិភាក្សាអំពីសន្តិសុខទឹក និងអភិបាលកិច្ចទឹក

២.ចែករំលែកចំណេះដឹង បទពិសោធន៍ តាមរយៈ​កិច្ចពិភាក្សា​ពហុភាគី​លើបញ្ហា​ប្រឈម​ផ្នែកសន្តិសុខ​ទឹកក្នុង​ប្រទេសកម្ពុជា និងតំបន់មេគង្គ

៣.កំណត់យុទ្ធសាស្ត្រ និងមាគ៌ា ដើម្បីបង្កើនសន្តិសុខទឹកក្នុងប្រព័ន្ធអេកូឡូស៊ីនៃទន្លេមេគង្គ និងបឹងទន្លេសាប

៤.កសាងបណ្តាញ និង​វេទិកា​ដើម្បី​គាំទ្រ​ដល់កិច្ច​សន្ទនា​គោលនយោបាយ​ទឹកដែល​កំពុង​វិវត្តស្រប​តាមអាទិភាពនៃអភិបាលកិច្ចទឹករបស់រាជរដ្ឋាភិបាលកម្ពុជា

៥.ការផ្តល់នូវអនុសាសន៍គោលនយោបាយផ្អែកលើភស្តុតាង ដើម្បីពង្រឹងអភិបាលកិច្ចទឹក និងការកែលម្អការផ្តល់សេវាទឹកស្អាត និងអនាម័យសម្រាប់សហគមន៍ដែលងាយរងគ្រោះ៕