កិច្ចប្រជុំនេះរៀបចំឡើងក្នុងគោលបំណង ដើម្បីពិនិត្យ និងពិភាក្សាសេចក្តីព្រាងបឋមនៃយុទ្ធសាស្រ្តនិរន្តរភាពគណនេយ្យភាពសង្គមនៅថ្នាក់ឃុំ សង្កាត់ សម្រាប់រៀបចំសេចក្តីព្រាងឯកសារនេះ ឱ្យមានលក្ខណៈគ្រប់ជ្រុងជ្រោយ មុននឹងដាក់ជូនក្រសួង ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិលពាក់ព័ន្ធពិនិត្យ និងផ្តល់យោបល់បន្ថែម។

គូសបញ្ជាក់ផងដែរថា លេខាធិការដ្ឋាន គ.ជ.អ.ប. ទទួលបានការគាំទ្រពីរាជរដ្ឋាភិបាលអូស្រ្តាលី (DFAT) តាមរយៈមូលនិធិបរធនបាលកិច្ច (Trust Fund) ដែលសម្របសម្រួលដោយធនាគារពិភពលោក បានជ្រើសរើសទីប្រឹក្សាឯករាជ្យ សម្រាប់រៀបចំយុទ្ធសាស្រ្តនិរន្តរភាពគណនេយ្យភាពសង្គមនៅថ្នាក់ឃុំ សង្កាត់ ដើម្បីធានានូវភាពជាម្ចាស់របស់រដ្ឋបាលថ្នាក់ក្រោមជាតិ ជាពិសេសរដ្ឋបាលឃុំ សង្កាត់ សាលាបឋមសិក្សា និងមណ្ឌលសុខភាព ក្នុងការអនុវត្តការងារគណនេយ្យភាពសង្គម បន្ទាប់ពីការចាកចេញរបស់ដៃគូអភិវឌ្ឍន៍ និងអង្គការសង្គមស៊ីវិលនាពេលខាងមុខ។