Deputy chairman
NCDD Library
Latest Report
លិខិតបទដ្ឋានគតិយុត្តថ្មីៗ
អនុក្រឹត្យការសុំច្បាប់មន្រ្តីរាជការស៊ីវិល
ពិធីចាប់ឆ្នោតយកឡូតិ៍ដីលំនៅឋាន និងឡូតិ៍ជីកសិកម្ម នៅឃុំថ្មី ស្រុកចិត្របុរី ខេត្តក្រចេះ របស់គម្រោង LASED
ក្រចេះ ១៩ តុលា ២០១២៖ នៅថ្ងៃទី ១៤ ខែកញ្ញា ឆ្នាំ២០១២ វេលា ម៉ោង៩ ព្រឹក នៅក្នុងទីធ្លាសាលាឃុំថ្មី ស្រុកចិត្របុរី ខេត្តក្រចេះ មានរៀបចំពិធីចាប់ឆ្នោតយកដីឡូតិ៍លំនៅឋាន និងដីឡូតិ៍កសិកម្ម របស់ប្រជាពលរដ្ឋទទួលបានដីសម្បទានសង្គមកិច្ចនៅជុំទី២ចំនួន ១៦៣ គ្រួសារ។
ចូលរួមជាគណៈអធិបតីក្នុងពិធីនោះរួមមាន ឯកឧត្ដមបណ្ឌិត សារេត បូរាមី នាយកគម្រោង LASED ឯកឧត្ដម ខ័ណ្ឌ ចំណាន អភិបាលរងខេត្ត និងជាប្រធានគ្រប់គ្រងគម្រោង LASED ខេត្តក្រចេះ លោក សួន ញ៉ាក អភិបាលស្រុកចិត្របុរី និងមានការចូលរួមដោយក្រុមការងារគម្រោង LASED /GSSLC ក្រុមការងារគម្រោង LASED ថ្នាក់ខេត្ត ក្រុមការងារថ្នាក់ស្រុក ក្រុមការងារឃុំ អង្គការGIZ និងប្រជាពលរដ្ឋ ទទួលបានដីទាំងជុំទី១ និងជុំទី២សរុបប្រមាណជាង ៥០០នាក់។
លោក មុំ ខាន់ មេឃុំថ្មីបានថ្លែងអំណរគុណដល់គណៈអធិបតីដែលបានឆ្លៀតឱកាសដ៏មានតម្លៃដើម្បីចូលរួមក្នុងពិធីចាប់ឆ្នោតយកដីឡូតិ៍លំនៅឋាន នឹងដីឡូតិ៍កសិកម្មនៅក្នុងឃុំថ្មី ស្រុកចិត្របុរី ខេត្តក្រចេះជុំទី២នេះ និងចែកសម្ភារបង្គន់អនាម័យដល់ប្រជាពលរដ្ឋទទួលបានដីសម្បទានសង្គមកិច្ច សរុបចំនួន ៤៣២គ្រួសារ ក្នុងនោះជុំទី១ចំនួន ២៦៩ គ្រួសារ និងជុំទី២ចំនួន ១៦៣ គ្រួសារ ហើយនេះជាលើកទីពីរហើយដែលឃុំថ្មីបានរៀបចំពិធីចាប់ឆ្នោតយកដីឡូតិ៍ក្នុងទីតាំងសម្បទានដីសង្គមកិច្ច។
លោក សំ ភឿន តំណាងប្រជាពលរដ្ឋទទួលបានដីសម្បទានសង្គមកិច្ចបានថ្លែងអំណរគុណដល់រាជរដ្ឋាភិបាល ដែលបានផ្ដល់ដីដល់ពួកគាត់តាមរយៈគម្រោង LASED ហើយពួកគាត់មានសេចក្ដីត្រេកអរយ៉ាងខ្លាំង ដែលឃុំរបស់គាត់មានសម្បទានដីសង្គមកិច្ចសម្រាប់ចែកជូន ប្រជាពលរដ្ឋក្រីក្រ ក្នុងនោះមានដីឡូតិ៍លំនៅឋាន ដីឡូតិ៍កសិកម្ម និងមានចែកជូនជាសម្ភារលំនៅឋាន និងសម្ភារកសិកម្មជាបន្តបន្ទាប់ទៀតផង។ តំណាងប្រជាពលរដ្ឋបានប្ដេជ្ញាចិត្ត ថានឹងទៅរស់នៅលើដីទាំងពីរប្រភេទនោះ ហើយខិតខំកាប់ឆ្ការ សម្អាត បង្កបង្កើនផលឲ្យបានជោគជ័យ និងកាន់កាប់លើដីនោះជារៀងរហូត។
ឯកឧត្ដម ខ័ណ្ឌ ចំណាន អភិបាលរងខេត្ត និងជាប្រធានគ្រប់គ្រងគម្រោង LASED ខេត្តក្រចេះ បានមានប្រសាសន៍ថា នេះជាលើកទីពីរហើយដែលឃុំថ្មីមាន ព្រឹត្តិការចាប់ឆ្នោតជ្រើសរើសឡូតិ៍ដីដែលយើងទទួលបានពីគម្រោង LASED ដែលជាគម្រោងរបស់រាជរដ្ឋាភិបាលដើម្បីចូលរួមកាត់ បន្ថយភាពក្រីក្ររបស់ប្រជាពលរដ្ឋ ហើយកន្លងមកនៅឃុំថ្មីក្នុងជុំទី១ ប្រជាពលរដ្ឋបានទទួលដីកសិកម្មចំនួន៥១គ្រួសា និងដីលំនៅឋានចំនួន៥គ្រួសារ ហើយទទួលបានដីទាំងពីរប្រភេទចំនួន ២១៣ គ្រួសារ។
ដោយឡែកនៅជុំទី២នេះ មានដីលំនៅឋានចំនួន ១៣៨ គ្រួសារ និងដីកសិកម្មចំនួន ១៦០គ្រួសារ។ នៅជុំទី១ យើងបានបង្ហាញដីឡូតិ៍ជូនបងប្អូនជាបន្តបន្ទាប់ និងបានចែកសម្ភារលំនៅឋាន សម្ភារកសិកម្ម ស្បៀងពលកម្ម និងសម្ភារប្រើប្រាស់ក្នុងផ្ទះរួចរាល់ហើយ។ ដោយឡែកយើងនៅសល់មួយមុខទៀតគឺសម្ភារបង្គន់អនាម័យ (លូចំនួន៤កង់ ចានបង្គន់ គម្របពីលើលូ ស័ង្កសី៣សន្លឹក និងទុយោជ័រ) សម្រាប់បងប្អូនប្រជាពលរដ្ឋទទួលបានដីលំនៅឋានទាំងជុំទី១ និងជុំទី២។ ថ្ងៃនេះយើងបានទំនាក់ទំនងជាមួយក្រុមហ៊ុនឲ្យដឹកសម្ភារបង្គន់មកហើយ តែដោយសារយើងបានជ្រើសរើសមុខសញ្ញាទទួលដីលំនៅឋានមិនបានគ្រប់ចំនួនតាមចំនួនកំណត់ដែលបានធ្វើលទ្ធកម្ម ដោយនៅ ខ្វះ៥៣ គ្រួសារទៀត។ ដូច្នេះក្រុមហ៊ុនរង់ចាំដឹកមកឲ្យគ្រប់ចំនួន។ ម្យ៉ាងទៀតយើងមានសម្ភារកសិកម្មសម្រាប់ជុំទី២រួចហើយ គឺនៅខ្វះតែអង្ករ ១៦០ គ្រួសារ ដែលគ្រោងចែកជូននៅ ថ្ងៃទី១៧ ខែកញ្ញា ឆ្នាំ២០១២ ខាងមុខនេះ។
ចំពោះមុខសញ្ញាដែលបានជ្រើសរើសនោះគឺដីកសិកម្មលើសផែនការចំនួន ៦៥ គ្រួសារ និងដីលំនៅឋានខ្វះ ៥៣ គ្រួសារ។ ចំពោះសម្ភារសាងសង់ផ្ទះ យើងបានចែកជូនរួចហើយសម្រាប់ជុំទី១ និងជុំទី២នៅខ្វះតែស័ង្កសី និងជើងតាង។ ដូច្នេះនៅក្នុងឃុំថ្មី ទាក់ទងនឹងសម្ភារមិនមានការយឺតយ៉ាវទេ ដោយសារយើងមានសម្ភារក្នុងឃ្លាំងមុនពេលជ្រើសរើសមុខសញ្ញា។ ទាក់ទងការងារហេដ្ឋារចនាសម្ព័ន្ធ យើងកំពុងឈូសឆាយផ្លូវក្នុងទីតាំងដី សម្អាតដីឡូតិ៍កសិកម្ម និងដីលំនៅឋានបានពីរដំណាក់កាលរួចហើយ ជាពិសេសផ្លូវចូលទីតាំងដីប្រវែង ១៦០០ម កំពុងដេញថ្លៃ នៅតែបង្ហាញដីឡូតិ៍ជូនបងប្អូន គឺបងប្អូនអាចចូលទៅសាងសង់ផ្ទះ និងរស់នៅបានហើយ។
ឯកឧត្ដមបណ្ឌិត សារេត បូរាមី នាយកគម្រោង LASED បានមានប្រសាសន៍សំណេះសំណាល និងចូលរួមសប្បាយរីករាយជាពន់ពេកជាមួយបងប្អូន ទទួលបានដីទាំងអស់នៅក្នុងឃុំថ្មីដែលថ្ងៃនេះយើងបានធ្វើពិធីចាប់ឆ្នោតយកលេខឡូតិ៍ដីលំនៅឋាន និងលេខឡូតិ៍ដីកសិកម្ម។អ្នកខ្លះបានដីលំនៅឋាន អ្នកខ្លះបានដីកសិកម្ម និងអ្នកខ្លះបានដីទាំងពីរប្រភេទ។ ចំពោះទីតាំងដីមានចម្ងាយប្រហែល ៤ គម ពីសាលាឃុំនេះទេ ហើយបងប្អូនក៏បានស្គាល់ទីតាំងដីនេះដែរ។ ដូច្នេះជាការងាយស្រូល ដែលឃុំថ្មីពេលជ្រើសរើសដី គឺក្រុមការងារបានកំណត់យកទីតាំងដីនេះ ព្រោះជាទីតាំងដែលល្អ នៅក្បែរភូមិស្រាប់ ហើយដែលគ្រោងរៀបចំភូមិថ្មីនេះឲ្យចេញជារូបរាងនៅលើទីតាំងដីដូចក្នុងផែនទីដែលបានបង្ហាញនេះ។
ឯកឧត្ដមបណ្ឌិតបានមានប្រសាសន៍ទៀតថា ឱកាសនៃការប្រគល់ដីឬចែកដីនេះ គឺជាលទ្ធផលជំហានទីមួយ ប៉ុន្តែវាជាលទ្ធផលសំខាន់បំផុត ហើយសូមចូលរួមសប្បាយរីករាយជាទីបំផុតជាមួយបងប្អូន ហើយសមិទ្ធផលដែលទទួលបានថ្ងៃនេះ គឺជាការខិតខំប្រឹងប្រែងយ៉ាងខ្លាំងរបស់ក្រុមការងារថ្នាក់ខេត្ត ថ្នាក់ស្រុក និងក្រុមការងារថ្នាក់ឃុំ។ ដីនេះត្រូវបានប្រកាស ជាដីសម្បទាន សង្គមកិច្ចសម្រាប់ចែកជូនប្រជាពលរដ្ឋក្រីក្រតាំងពីឆ្នាំ២០១០មក ។ដូច្នេះវាមានពេលវេលាយូរហើយដែរ។ ម្យ៉ាងទៀតដីនេះជាដីដែលរាជរដ្ឋាភិបាលផ្ដល់ជូនប្រជាពលរដ្ឋដែលមានយើងខ្ញុំ ជាមន្ត្រីរបស់រាជរដ្ឋាភិបាលជាអ្នកអនុវត្ត ហើយមិនមានអង្គការ ឬស្ថាប័នណាមួយមានសិទ្ធ ផ្តល់ដីជូនប្រជាពលរដ្ឋឡើយ។
ឯកឧត្ដមបានសំណូមពរដល់ប្រជាពលរដ្ឋទទួលបានដីទាំង អស់ឲ្យឯកភាពគ្នាលើមតិប្ដេជ្ញាចិត្តតំណាងរបស់ខ្លួនថា នឹងទៅរស់នៅលើដីទាំងពីរប្រភេទនោះខិតខំកាប់ឆ្ការ សម្អាត បង្កបង្កើនផល ឲ្យបានជោគជ័យ និងធ្វើឲ្យជីវភាពបានធូរធារ ហើយកាន់កាប់ជាមរតកលើដីនោះជារៀងរហូត ហើយសូមឲ្យពាក្យនេះក្លាយជាសកម្មច្បាស់លាស់ពិតប្រាកដ ដើម្បីបញ្ជាក់ពីការឯកភាពលើការប្ដេជ្ញាចិត្តរបស់បងប្អូន។ អ្វីដែលក្រុមការងារចង់បានគឺពេលបងប្អូនបានដីហើយ គឺទៅរស់នៅនិងបង្កបង្កើនផលលើដីនោះ ដើម្បីបង្កើនកម្រិតជីវភាពរស់នៅរបស់បងប្អូន។ ប៉ុន្តែអ្វីដែលជាការព្រួយបារម្ភរបស់យើងទាំងអស់គ្នា គឺក្រោយពីបានប្រគល់ដីជូនបងប្អូនរួចហើយបែរជាគ្មានអ្នកណាម្នាក់ទៅរស់នៅលើដីនោះ ហើយទាំងអស់នេះជាការទទួលខុសត្រូវរបស់ក្រុមការងារយើងខ្ញុំតាំងពីថ្នាក់ជាតិ ថ្នាក់ ខេត្ត ថ្នាក់ស្រុក និងថ្នាក់ឃុំ ដែលមានន័យថា ក្រុមការងារយើងខ្ញុំបានផ្ដល់ដីដល់អ្នកមិនចង់ ទៅរស់នៅ។
ឯកឧត្ដមបានបញ្ជាក់ថា យើងអាចបង្កើតជាភូមិថ្មីព្រោះទីតាំងដីនេះមានប្រជាពលរដ្ឋជាច្រើនគ្រួសារដែរ។ ទាំងនេះគឺជាការណែនាំរបស់ថ្នាក់ដឹកនាំ ព្រោះកាលណាមានភូមិថ្មី យើងងាយស្រួលគ្រប់គ្រង និងចងក្រងជាសហគមន៍។ ទាក់ទងនឹងស្បៀងពលកម្ម សូមឲ្យ បងប្អូនយកទៅប្រើប្រាស់សម្រាប់ធ្វើពលកម្មនៅលើដីដែលបានផ្ដល់ជូនមិនមែនដីដែលបងប្អូនធ្លាប់រស់នៅ ឬដីនៅកន្លែងផ្សេងទៀតនោះទេ។ ដូច្នេះយើងចង់ឃើញដីដែលបានចែកជូនទាំងដីលំនៅឋាន និងដីកសិកម្មស្អាតក្រោយពីបានប្រគល់ជូនរួច។ ចំពោះដីកសិកម្មគម្រោង ជួយឈូសឆាយជូនកន្លះហិកតាក្នុងមួយគ្រួសារ។ ដូច្នេះផលដែលបានបងប្អូនអាចយកមកសម្អាតដីបន្តទៀត។ ពិធីនេះបានបន្តរហូតប្រជាពលរដ្ឋបានចាប់ឆ្នោតយកដីឡូតិ៍ និងចែកសម្ភារដល់អ្នកទទួលដីទាំងជុំទី១ និងជុំទី២ សរុបចំនួន ៤៣២ គ្រួសារ៕ ដោយៈ ស៊ិន សុខុន
