News/Events 
ភ្នំពេញ ២៧ មករា ២០១២៖ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប)
កាលពីថ្ងៃទី២៦ ខែមករា ឆ្នាំ២០១២ បានពិភាក្សា ផ្តល់យោបល់ និងឯកភាពលើសេចក្តីព្រាងអនុក្រឹត្យស្តីពីកិច្ចដំណើរការទូទៅនៃការផ្ទេរមុខងារ និងធនធានទៅរដ្ឋបាលថ្នាក់ក្រោមជាតិ ដើម្បីដាក់ជូនរាជរដ្ឋាភិបាលពិនិត្យ និងសម្រេចនៅក្នុងត្រីមាសទី១នៃឆ្នាំ២០១២ នេះ។
ការផ្ទេរមុខងារ និងធនធានទៅរដ្ឋបាលថ្នាក់ក្រោមជាតិ គឺជាសមាសធាតុស្នូលមួយនៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ (២០១០-០១៩)។ ផែនការអនុវត្តបីឆ្នាំដំបូង(ផអ៣/២០១១-២០១៣) នៃកម្មវិធីជាតិ ក៏បានកំណត់ឲ្យមានការរៀបចំបង្កើតនូវលិខិតបទដ្ឋានច្បាប់ និងសៀវភៅណែនាំបច្ចេកទេសនានាសម្រាប់កិច្ចដំណើរការផ្ទេរមុខងារ និងធនធានទៅរដ្ឋបាលថ្នាក់ក្រោមជាតិ ព្រមទាំងកំណត់ឲ្យមានការដាក់ឲ្យអនុវត្តសាកល្បងនូវការផ្ទេរមុខងារជាមូលដ្ឋាន សំខាន់ៗមួយចំនួន រួមជាមួយនឹងការផ្ទេរធនធានសមស្របឲ្យទៅរដ្ឋបាលថ្នាក់ក្រោមជាតិ។
ដោយមានកិច្ចសហការជាមួយក្រសួង ស្ថាប័ន និងអ្នកពាក់ព័ន្ធសំខាន់ៗ អនុគណៈកម្មាធិការមុខងារនិងធនធាននៃ គ.ជ.អ.ប និងលេខាធិការដ្ឋាន គ.ជ.អ.ប បានធ្វើការសិក្សា និងរៀបចំសេចក្តីព្រាងអនុក្រឹត្យស្តីពីដំណើរការទូទៅនៃការផ្ទេរមុខងារ និងធនធានទៅអោយរដ្ឋបាលថ្នាក់ក្រោមជាតិ ក្នុងគោលបំណងកំណត់នូវគោលការណ៍សំខាន់ៗ និងកិច្ចដំណើរការទូទៅនៃការរៀបចំផ្ទេរមុខងារ និងធនធានទៅអោយរដ្ឋបាលថ្នាក់ក្រោមជាតិ ដើម្បីធានាអោយកិច្ចដំណើរការផ្ទេរមុខងារ និងធនធាននេះប្រព្រឹត្តទៅនៅក្នុងលក្ខណៈជាប្រព័ន្ធ ជាជំហ៊ានៗ និងដោយប្រុងប្រយ័ត្ន។
ថ្លែងក្នុងកិច្ចប្រជុំលើកទី៦របស់ គ.ជ.អ.ប កាលពីថ្ងៃទី២៦ ខែមករា ឆ្នាំ២០១២ ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប បានមានប្រសាសន៍តាមរយៈសុន្ទរកថា ថា កំណែទម្រង់វិមជ្ឈការ និងវិសហមជ្ឈការ គឺមានការពាក់ព័ន្ធចាំបាច់ទៅនឹងការផ្ទេរមុខងារ និងធនធានទៅអោយរដ្ឋបាលថ្នាក់ក្រោមជាតិ ដើម្បីបង្ខិតសេវាអោយទៅកៀកប្រជាពលរដ្ឋ មានតម្លាភាព និងមានគណនេយ្យភាពចំពោះប្រជាពលរដ្ឋ និងបង្កើនភាពជាម្ចាស់របស់រដ្ឋបាលថ្នាក់ក្រោមជាតិដែលជាអ្នកជាប់ឆ្នោត និងការចូលរួមរបស់ប្រជាពលរដ្ឋ ដែលជាការរួមចំណែកដ៏មានសារៈសំខាន់សម្រាប់កិច្ចអភិវឌ្ឍមូលដ្ឋាន។
ឯកឧត្តម ស ខេង មានប្រសាសន៍បន្តថា៖ «ក្នុងខណៈដែលរចនាសម្ព័ន្ធ និងប្រព័ន្ធសំខាន់ៗនៃរដ្ឋបាលថ្នាក់ក្រោមជាតិត្រូវបានរៀបចំឡើងវិញ និងដាក់អោយអនុវត្តជាបណ្តើរៗ រួចហើយនោះ នេះជាពេលវេលាដ៏សមស្របមួយ ដែលយើងត្រូវចាប់ផ្តើមគិតគូរអំពីការផ្ទេរមុខងារ និងធនធានទៅអោយរដ្ឋបាលថ្នាក់ក្រោមជាតិ ដើម្បីអោយរដ្ឋបាលថ្នាក់ក្រោមជាតិទាំងនោះមានលទ្ធភាពគ្រប់គ្រាន់ក្នុងការរៀបចំ និងគ្រប់គ្រងការផ្តល់សេវានានាដែលខ្លួនអាចធ្វើបានប្រកបដោយប្រសិទ្ធភាពជូនប្រជាពលរដ្ឋតាមតម្រូវការដែលបានកំណត់នៅក្នុងផែនការអភិវឌ្ឍន៍របស់ខ្លួនក្រោមការទទួលខុសត្រូវយ៉ាងពេញលេញ និងមានគណនេយ្យភាពចំពោះប្រជាពលរដ្ឋក្នុងដែនសមត្ថកិច្ចរបស់ខ្លួន»។
ឯកឧត្តម ស ខេង មានប្រសាសន៍ថា កិច្ចដំណើរការផ្ទេរមុខងារ និងធនធានគឺជាកិច្ចការដ៏សាំញាំ និងរសើប ប៉ុន្តែវាជាកិច្ចការដែលចាំបាច់ត្រូវតែអនុវត្ត ដោយមានការតាំងចិត្ត និងការសម្របសម្រួលជាមួយយុទ្ធសាស្ត្រតាមវិស័យនានាសម្រាប់ការលើកកម្ពស់ការផ្តល់សេវាសាធារណៈ។
«យើងត្រូវបំពេញការងារនេះដោយប្រុងប្រយ័ត្ន និងដោយផ្អែកលើស្ថានភាពជាក់ស្តែងនៃសង្គម សេដ្ឋកិច្ច និងសមត្ថភាពធនធានមនុស្សរបស់យើង ជាមួយការរៀនសូត្របទពិសោធន៍ពីប្រទេសផ្សេងៗទៀត ទាំងនៅក្នុងនិងក្រៅតំបន់ដើម្បីបង្កាកុំអោយមានការខុសឆ្គង និងត្រៀមលក្ខណៈបង្ការជាមុននូវបញ្ហាប្រឈម និងការគ្រប់គ្រងហានិភ័យនានា ដែលអាចលេចចេញពីដំណើរការផ្ទេរមុខងារ និងធនធាននេះអោយស្ថិតនៅក្នុងកម្រិតមួយដែលអាចគ្រប់គ្រង និងដោះស្រាយបាន»៕
